أصـــول الزقـــرته (: - دروب المُحبين

#1 11-29-2010

الحب في سلم الأجاويد ممنوع
والحب في سلم المقاريد عاده
ياقلب لاتحزن ولو كنت موجوع
عجزت أنا أعلّمك معنى الجلاده
أنا أدري إنّك من عراويك مخلوع
وأدري بأنّ الموت حولك لحاده
إصبر وتلقى لك مع الوقت مشروع
ينْسيك همّك والعوض بالسعاده
وإن جاك ضيمٍ أو لحق صبرك (ا)جزوع
طنّش تعش والليل ما أحلى رقاده
السبت ياثقله مع أيّام الإسبوع
من طوله تحسّ إن ساعاته زياده
شفت المسيح تبالغ فحب ياسوع
ثمّ مجّدوه وصار رمز العباده
الليل سترٍ ..لاغدى الستر مقشوع
وإن ماهجدْك الهمّ عجّل هجاده
لا تبخل بضحكك ترى العمرْ مبيوع
أبيع عمري كاش ولا أطلب إعاده
خصٍ ليا صار الرجا حبّة الكوع
وش لي بلوي ذراع حظّي وعناده
ماكل من عاتب غدى عتاب مرفوع
وماكل إعاده تلقى فيها الإفاده
علمٍ وصلك وتالي العلْم متبوع
يامن على وجهه ملامح بلاده
ما أنته غبي لكنّك أقشر ومصروع
يالقايد الفاهم ياراس الجراده
لو إنّي أشوف الأمل فيك مقطوع
ذكّرتني ..ذكّرك ربّي الشهاده
بعطيك من مناهل الفقه قرطوع
إن كان ماتفقه أصول القياده
ضرغام جاع وما حنى راسه الجوع
بيته على المشراف يشهد هداده
واللّيث مايقنص لأجل عين جربوع
وما ترهب القنّاص طلقة (ا)زناده
يازقرت وإن كانك على الهوش ملفوع
دوّر شنب مثلك وورّه السياده
أنا تراي انثى وفي طبعي إميوع
لو كان ترجح لي كفوف الإراده
والله لتموت ولا ظهر منّي خضوع
دام النّكد طبعك فأنا أم النّكاده
إحذر ترى كيدي بالآيات مسموع
سمّاه ربّي وآمنت به عباده
إن كنت في نفسك مولّع ومخدوع
أنا أبخص بقلبك وأنا أكشف سواده
شفني رغم كثر المعاناة واللوع
ورغم إنسياب الدمع ورغم إحتداده
أبقى بشموخ ودايم الراس مرفوع
الدّين تاجي والمبادي قلاده
بقفّل الموضوع وبدخل في موضوع
دام الفكر يسهل عليّه إقتياده
آخذْه وأجيبه وأناديه ويطوع
من فوق خشم الحظّ وأبو القراده
للشعر في راسي كما قيل ينبوع
يروي ظمى منهو تعنّى ميراده
ماغير أفضفض به عنى وقت ودموع
مانيب صعلوكه ولا أرجي إشاده
قمّة طموحي يصير إسم (نجد) مطبوع
في ذاكرة جيلي هويت الرياده
لي شاعره :نجد بنت مطير