غيوض ومرثية زوجها ولي العهد الامير نايف رحمة الله - دروب المُحبين

#1 07-14-2012

هذه الابيات الحزينه للشاعره غيوض (( مها بنت محمد الاحمد السديري )) زوجة نايف رحمه الله تعالى ,, ويحق لها ترثيه

الله يجبر مصابك يالغيوض فقد كان لك ِ محبا شديد المحبه ,,

العآم يا ام سعود كآن الحزن ضيف
واليوم .... دق أوتآده الحزن فينآ

الحزن غيمه غيبت نجمة الصيف
وبأسباب جوره ...ياجواهر شكينا

غاب الحبيب ولابقى للهنآ طيف
والآه.... يانوره تهــاوت علينا

كن الظهر ياسعود فيه انغمد سيف
والصدر صار لكل الاوجاع مينا

اقول يامحمد متى فآرق وكيف؟
واصيح ياسآره متى هو بيجينا

يانوف من عقبه ترى بسمتي زيف
جف الفرح من حولنا وانطفينا

ابوك يانواف ماله تواصيف
وانشد مشاعل كان مثله لقينا

والكون ياهيفاء بلا ظله مخيف
واعذر بكانا يافهد لو بكينا

كان القمر كان البحر والمجاديف
كان الحنان اللي بحضنه دفينا

وكان الملاذ لشآكي الضيم والحيف
كم شال عنا كم خذآ من يدينا

عآش ورحل كله مهابه وتشريف
جار الحرم فوق الحكي لو حكينا

والله لو كان المقدر على الكيف
ماغبت يانايف ولا احنا ضمينا

كل مارخيت الجفن جدت عواصيف
والشوق ثار وفارقتني السكينا

وشفتك مثل شمسً بروس المشاريف
نورك يناديني وانا اقول وينآ

وألقآك واصحى وألمحك راقي النيف
حيٍ ولو صلت عليك المدينآ

احسك بجواي ماهي تخاريف
ياسآكن عيون المهآة الحزينآ

في ذآ جلسنا بين صمت وسواليف
وفي ذآ الممر اثنينا كم مشينا

وفي هالزوآيآ كم جمعنا مواليف
وياما على ذيك المرآيآ ضوينآ

عشرة عمر ماتنتهي بالصواديف
وذكرى تبي تحيا ولو مابقينآ

الموت يانايف كتآب وتصآريف
وحنا بحكم اللي خلقنآ رضينآ

الشاعرهـ / مها السديري { غيوض }