سكتنا عن الموضوع وسكوتنا معذور ، وبعد ما انتهى الموضوع غنيت للتذكير

[سرى الليل]

بياض المزون وعفّة الما وصدق النور ،
نواياك يا اللّاممكن وطيبتك يا الغير !
ㅤㅤ
ㅤㅤ ㅤㅤ
انا قبل اعرفك كنت اقول الزمان يدور ،
وبعد ماعرفتك صرت اقول الزمان بخير
ㅤㅤ
ㅤㅤ ㅤㅤ
اشوفك عليّ كثير لو ما عليّ قصور ،
ولا فيه بين الناس غيرك عليّ كثير !
ㅤㅤ
ㅤㅤ ㅤㅤ
واشوفك مسيرة حق تلغي مسيرة جور ،
وتفسير لـ اقسى شيّ ماكان له تفسير ..
ㅤㅤ
ㅤㅤ ㅤㅤ
واشوفك عذر تأخير سيل الثرى الممطور ،
تباطوه من كبره و كبره .. عذر تأخير
ㅤㅤ
ㅤㅤ ㅤㅤ
واحس بيديني قيد واحس حولي سور ،
واحس اني اكثر حر واكبر من التحرير
ㅤㅤ
ㅤㅤ ㅤㅤ
على الآسر الطيّب رضا الطيّب المأسور ،
من الان لين يشال والجمع فيه يسير !
ㅤㅤ
ㅤㅤ ㅤㅤ
وعلى الوجه الأتقى ما يرد الحزن مسرور ،
ويسمن من الطاعه و يغني من التقدير !
ㅤㅤ
ㅤㅤ ㅤㅤ
كثير الشكر ما فيه كثرك بشر مشكور ،
ولا فيه شكرٍ فيك ما يلحقه تقصير !
ㅤㅤ
ㅤㅤ ㅤㅤ
عليك الثنا ما طل صبح وشدا عصفور ،
ولك المدح ما هلت سحايب ورفرف طير
ㅤㅤ
ㅤㅤ ㅤㅤ
سما شاعرك عن عمد عن رغبة الجمهور ،
وتعمدك .. والنيّات تحتاج للتبرير
ㅤㅤ
ㅤㅤ ㅤㅤ
علي من فضل مدك مايغني عن المذخور ،
ولي من حسن ظنك مايغني من التوقير
ㅤㅤ
ㅤㅤ ㅤㅤ
وانا اللي مليت الارض حس وشعر وشعور ،
وانا قايد التجديد ومحطم التكرير
ㅤㅤ
ㅤㅤ ㅤㅤ
ومن طيب راسي ما دخلني كبر وغرور ،
اشوف الرجال رجال واعذرب التحقّير
ㅤㅤ
ㅤㅤ ㅤㅤ
جمايلك فرقبتي ولي فالجمايل دور ،
وماصار لولاك انت وشلون راح يصير
ㅤㅤ
ㅤㅤ ㅤㅤ
لك الحمد ياربي على السالف المذكور ،
ولك المجد يا كفٍ ما يعرف وش التوفير
ㅤㅤ
ㅤㅤ ㅤㅤ
فحول القصيد إلها فـ غير القصيد حضور ،
يشاف الفعل لو كان ما للفعل تصوير
ㅤㅤ
ㅤㅤ ㅤㅤ
يقولون .. رد الباب يا الشاعر المشهور ،
وانا اقول .. لا والله ما ارد باب الخير !
ㅤㅤ
ㅤㅤ ㅤㅤ
عسى من سعابي في مدى سعيه المبرور ،
له بجنة الفردوس مثوى وقصر وبير
ㅤㅤ
ㅤㅤ ㅤㅤ
وعساني وفيّ ذمه ومتجمل وماجور ،
وعلى هقوة الهاقي بصبح ومسا وعصير
ㅤㅤ
ㅤㅤ ㅤㅤ
سكتنا عن الموضوع وسكوتنا معذور ،
وبعد ما انتهى الموضوع غنيت للتذكير
ㅤㅤ
ㅤㅤ ㅤㅤ
انا اغيّر الساحه واغيّر بعض الامور ،
لكن المراجل غير واكبر من التغيير !
ㅤㅤ