وين انت ياغايب وش اللي جرى لك
القلب من غيبتك للضيق مفلوت
كذا بدون اسباب تمضي رحالك
ماتدري انك لي كما الماي والقوت
عذبتني من كثر ما انا اعنالك
دربي من الجيات واضح ومنحوت
ترى المحبه والغلا كلها لك
مع كل باب اقول ياصاحبي فوت
انت القمر بالليل يضوي جمالك
وانت الوحيد اللي من الغيد ممقوت
وانت الجواب اللي يجاوب سؤالك
وانت الحياه اللي قبل ساعة الموت
ياصاحبي والعمر كله حلالك
آمر تدلل ياحلاوه وبسكوت
ياورد ياريحان والطيب فالك
يادر ياألماس ياعقد ياقوت
لا تبطي الغيبه وانا بإحتمالك
صبري نفد وانته ترانيمك سكوت